«Елбасы медалі» иегерлерінің есімдері жарияланды
2021 жылғы 15 желтоқсанда Нұр-Сұлтан қаласында «Елбасы медалі» бағдарламасына қатысушыларды марапаттау жөніндегі комиссия отырысы өтті. Комиссия бағдарламаны іске асыру нәтижелерін қарап, оны табысты аяқтаған 2259 адамды марапаттауға ұсынды.
Бағдарламаны іске асыру барысы мен «Елбасы медалі» бағдарламасының қола, күміс және алтын деңгейіне қатысушылардың нәтижелері туралы «Елбасы Академиясы» КҚ басқарушы директоры Әнуар Жанғозин айтып берді.
«Бүгін біз Елбасы медалінің иегері болатын 2259 қатысушыны бекіттік, оның ішінде 2216 қола, 40 күміс және 3 алтын медаль. Сондай-ақ, 344 қатысушы бағдарламаны аяқтап, сертификат алады», - дейді.
Қазіргі уақытта «Елбасы медалі» бағдарламасына 20 000-нан астам адам қатысады. Оның ішінде 83% - мектеп оқушылары, 11% - студенттер, 6% - жұмыс істейтін жастар, 24% ауыл тұрғындары.
2019 жылдан бастап жалпы алғанда 6186 қазақстандыққа медаль табысталды, мемлекеттік білім беру гранттары Елбасы медалінің 605 иегеріне берілді, олардың 30% - дан астамы ауыл мектептерінің түлектері.
Естеріңізге сала кетейік, жоба Қазақстан Республикасының Тұңғыш Президенті – Елбасының «Еl Úmiti» бастамасымен жас таланттар мен ел көшбасшыларын қолдау және дамыту аясында жүзеге асырылуда. Бұл – жастарды кешенді дамытуға бағытталған ұлттық деңгейдегі жалғыз бағдарлама.