26-27 қазанда Астанада «El Umiti Cup 2024» ұлттық дебат турнирі өтті
2024 жылғы 26-27 қазанда Астанада дәстүрлі «El Umiti Cup 2024» ұлттық дебат турнирі қазақ және ағылшын тілдерінде өтті. 2021 жылдан бастап ұйымдастырылып келе жатқан бұл турнир мектеп оқушылары арасында Қазақстанның жас көшбасшыларын және болашақ ораторларын біріктіретін ең ірі республикалық дебаттық іс-шара ретінде өзін танытты.
Турнирдің басты мақсаттары – мектеп оқушыларының дебаттық дағдыларын дамыту, жастарды сыни ойлауға және шешендік өнерге баулу, сондай-ақ жас ұрпақ арасында азаматтық қоғам мен патриотизмді нығайту. Интеллектуалды және коммуникативтік дағдылардың жоғары стандарттарын қолдай отырып, турнир елдің белсенді және білімді жастарын қалыптастыруға ықпал етеді.
Биыл турнирге Қазақстанның 18 өңірінен онлайн іріктеу нәтижесінде таңдалған 94 үздік спикер қатысты. Турнирде республикалық және халықаралық аренада танылған тәжірибелі дебатерлер, сонымен қатар Хорватиядан келген халықаралық сарапшы Роберт Раос әділқазы болды.
Ағылшын лигасының жеңімпаздары 2025 жылы Панамада өтетін мектеп оқушылары арасындағы әлем чемпионатына (World Schools Debating Championships) қатысып, Қазақстанның намысын әлемдік дебат алаңында қорғайтын бірегей мүмкіндікке ие болады.
«El Umiti Cup 2024» турнирінің жеңімпаздары: Қазақ лигасы: «Last chance» командасы (Айтбаев Алихан мен Бердімұрат Алмат). Ағылшын лигасы: «Deputies of Coconut Tree Department» командасы (Intissar Bakhytzhan, Alen Aussenov, Arina Lepekhina).
Турнирдің құрметті қонақтары қатарында белгілі қоғам қайраткерлері мен БАҚ өкілдері болды: деректі фильмдер авторы әрі журналист Әлия Әшім, сондай-ақ «AMANAT» партиясы Орталық аппаратының саяси жұмыс департаментінің бас кеңесшісі Бекарыстан Нұрланұлы Аманжолов.