2023 жылғы «Мың бала» Ұлттық зияткерлік олимпиадасы I кезеңінің нәтижесі шықты
«Мың бала» Ұлттық зияткерлік олимпиадасында 5 мың финалистің есімі анықталды. Олар ауыл мектептерінің 6-сыныбында оқиды.
«Мың бала» олимпиадасы төртінші жыл қатарынан қабілетті ауыл оқушыларын анықтап келеді. Жеңімпаздар дарынды балаларға арналған мамандандырылған мектептерінде оқуға мүмкіндік алады. «Мың бала» олимпиадасын «Ел Үміті» корпоративтік қоры Қазақстан Республикасы Оқу-ағарту министрлігімен серіктестікте бірлесіп өткізеді.
Ауыл мектептеріне арналған "Мың бала" олимпиадасының бірінші кезеңі онлайн форматта арнайы әзірленген платформада өтті. Бірінші кезеңге қатысқан оқушылар интернетке қосылған барлық құрылғылар мен компьютерлер арқылы кіруге мүмкіндігі болды.
Еліміз бойынша ауыл мектебінде 6-сыныпта 150 575 оқушы оқиды. 1-30 наурыз аралығында 91 565-і олимпиадаға тіркеліп, онлайн тестілеуге 82 мыңға жуық оқушы қатысты. Олар 30 минуттан кем емес, 90 минуттан артық емес уақытта логикалық ойлау мен кеңістіктік ойлау бойынша жалпы 40 сұраққа жауап беруге тырысты. Биыл олимпиаданың шекті балы 325,37 болып белгіленді.
Олимпиада екі кезеңнен тұрады. I кезең 3-7 сәуір аралығында онлайн форматта өтті. Ең жоғары қорытынды балл жинаған 5 мың оқушы олимпиаданың II кезеңіне өтеді. II кезең 2023 жылдың 26-28 сәуірінде өңірлік тестілеу орталықтары базасында өтеді. Финалистер математикалық сауаттылық, (қазақ тілінде білім алатын оқушыларға) қазақ тілі, (орыс тілінде білім алатын оқушыларға) орыс тілі, ағылшын тілі және жаратылыстану ғылымдары бойынша академиялық білімдерін бағалау үшін компьютерлік тестілеуден өтеді.
Олимпиада жеңімпаздары еліміздің дарынды балаларға арналған жетекші мектептерінде, атап айтар болсақ Республикалық физика-математика мектебінде, «Білім-Инновация» лицейлерінде, «Дарын» мамандандырылған мектептерінде оқу үшін 1-10 маусымда өтініш беруі керек.
Олимпиаданың барлық қатысушылары өз нәтижелерін пайдаланушының жеке кабинетінен көре алады. Сондай-ақ, келесі жылы Олимпиаданы өткізуді жақсарту үшін барлық қатысушыларға сауалнамаға толығымен қатысуға шақырамыз.
Финалист атанған 5000 оқушыны құттықтай отырып, сайтта тестілеудің II кезеңіне https://ro.elumiti.kz/ сайтында дайындала алатыныңызды ұмытпаңыз. II кезеңнің тестілеу сынағы сізді күтіп тұр!