«El Umiti» қоры БҰҰ-ның Жаһандық SDSN желісінің Қазақстандағы ұлттық бөлімшесі – Sustainable Development Solutions Network (SDSN) Kazakhstan ұйымына қосылды. Бұл желі тұрақты даму бағытында жұмыс істейтін жетекші университеттерді, ғылыми-зерттеу орталықтарын және қоғамдық ұйымдарды біріктіреді.

SDSN Kazakhstan-ға мүше болу бірлескен зерттеулер жүргізуге, білім беру бастамаларын дамытуға және үздік тәжірибелермен алмасуға жол ашады. «El Umiti» қоры өз қызметінде дарынды жастарды қолдауға, білім беру саласындағы теңсіздікті азайтуға және болашақ көшбасшылардың әлеуетін ашуға басымдық береді.

SDSN Kazakhstan-пен серіктестік аясында қор Тұрақты даму мақсаттарына (ТДМ) арналған зерттеу жобаларына, білім беру бағдарламаларына, конференциялар мен әлеуметтік-экономикалық мәселелерді шешуге бағытталған аналитикалық жұмыстарға белсенді қатысуды көздейді.

SDSN Kazakhstan 2022 жылы Назарбаев Университетінің Жоғары мемлекеттік саясат мектебі жанынан құрылды. Ол 2012 жылы Біріккен Ұлттар Ұйымының бастамасымен құрылған Жаһандық SDSN желісінің бөлігі болып есептеледі. Бүгінде желі Қазақстанның жетекші университеттері мен ғылыми-зерттеу орталықтарын қамтитын 24 ұйымды біріктіреді. Оның негізгі бағыттары – білім мен серіктестікті дамыту, энергетика мен климат мәселелері, су және жер ресурстарын тиімді басқару.
«El Umiti» қорының SDSN Kazakhstan-ға қосылуы – әрбір балаға, оның әлеуметтік мәртебесі мен тұрғылықты жеріне қарамастан, сапалы білім алып, өзін-өзі дамытуға мүмкіндік беретін ашық әрі прогрессивті білім беру ортасын қалыптастыру жолындағы маңызды қадам.

Толығырақ ақпарат:  www.sdsnkz.nu.edu.kz