27-28 ақпан 2025 жылы Астанада «Білім беру ұйымының басшысының заманауи басқару дағдылары» тақырыбында ауқымды семинар-тренинг сәтті өтті. Іс-шараға еліміздің түкпір-түкпірінен мемлекеттік және жеке мектептердің, балабақшалар мен білім беру орталықтарының директорлары мен меңгерушілері қатысты. Семинардың мақсаты – білім беру ұйымдарын тиімді басқаруға қажетті кәсіби құзыреттерді дамыту және нақты тәжірибелік құралдармен қамтамасыз ету болды.
Тренинг барысында білім беру менеджментінің негізгі аспектілері қарастырылды: білім беру ұйымдарын лицензиялау және мемлекеттік бақылау, қақтығыстарды басқару және эмоционалды интеллектті дамыту, заманауи басқару әдістерін енгізу, өзгерістер мен тәуекелдерді стратегиялық басқару, сондай-ақ кәсіби дағдарыстың алдын алу әдістері.
Smart Ustaz жобасының жетекшісі Алина Хаматдинованың айтуынша, қазіргі білім беру ұйымдарының басшылары күрделі лицензиялау рәсімдерінен бастап кадр тапшылығына дейін көптеген қиындықтарға тап болуда. Сондықтан семинардың басты мақсаты – осы мәселелерді шешуге көмектесетін нақты іс-әрекет алгоритмдерін беру және білім беру ұйымдарын жаңа деңгейге көтеру.

Семинарды білім беру саласының жетекші сарапшылары – Есмагамбетова Ботагөз, Наримова Майя, Федотова Татьяна жүргізді. Форматы қатысушыларға жүйелі ақпарат алуға ғана емес, сонымен қатар нақты жағдайларды талдап, басқарушылық шешімдерді пысықтап, әріптестерімен тәжірибе алмасуға мүмкіндік берді.

Қатысушылар бағдарламаның тәжірибелік бағытын жоғары бағалады. «Бұл семинар лицензиялау процесін тереңірек түсініп, қызметкерлерді басқарудың жаңа әдістерін енгізуге көмектесті», – деп атап өтті тренингке қатысушы, Қостанай облысы, Лисаковск қаласындағы №6 жалпы білім беретін мектептің директоры Жарылқасымова Гүлмира. Астана қаласындағы «Көркем» балабақшасының меңгерушісі Түткішбаева Феруза: «Мұнда тек теория емес, жұмыста бірден қолдануға болатын нақты құралдар ұсынылғаны өте маңызды», – деп пікір білдірді.
Семинар қорытындысы бойынша барлық қатысушылар Smart Ustaz (smartustaz.kz) білім беру платформасындағы эксклюзивті материалдарға қол жеткізіп, біліктілікті арттыру сертификаттарын алды. Бұл семинар білім беру ұйымдары басшыларының басқарушылық құзыреттерін дамытуда маңызды қадамға айналды және оларды заманауи басқару әдістерін енгізуге қажетті білім мен тәжірибелік құралдармен қамтамасыз етті.