Қазақстан мектептері мен колледждерінің тарих пәнінің мұғалімдері арасында өткен республикалық «Тәуелсіздік дәуірі» олимпиадасы өз мәресіне жетті. Бұл шара кәсіби даму мен тәжірибе алмасуға, сондай-ақ ұлттық құндылықтарды дәріптеуге бағытталған бірегей алаң ұсынды.  

Биыл төртінші жыл қатарынан өткізіліп жатқан олимпиаданың негізгі мақсаты – жастар арасында тәуелсіздік тарихына қызығушылықты арттыру және мұғалімдерге қолдау көрсету. Шара барысында ұстаздар дағдыларын жетілдіріп, тәуелсіз Қазақстанның тарихына қатысты маңызды оқиғаларды зерттеу мүмкіндігіне ие болды. Бұл бастама мұғалімдер арасында тәжірибе алмасуға және білім беру әдістерін жетілдіру жолында ынтымақтастықты дамытуға ықпал етті. 

Олимпиада екі кезеңнен тұрды. Бірінші кезең онлайн форматта өтті және 1қ қараша мен 29 қараша аралығында https://kzgame.kz платформасында ұйымдастырылды. Іріктеу кезеңінде еліміздің түкпір-түкпірінен қатысқан мұғалімдер өз білімдерін сынап, ең жоғары нәтижелерге қол жеткізуге тырысты. Ақмола, Қостанай облысы мен Алматы қаласының қатысушылары ең жоғары нәтижелер көрсетіп, ең үздік 20 мұғалім финалға өтті. Екінші кезеңде теориялық және практикалық тапсырмаларды орындады. 

Финал нәтижесінде үздік үш қатысушы анықталды. Бірінші орынды Ақмола облысынан Шарипова Амина жеңіп алды. Екінші орын Алматы қаласынан Қондыбаева Гүлназға бұйырды. Үшінші орынды Жамбыл облысынан Бозымбекова Айжан иеленді. Жеңімпаздарға планшет, ноутбук және колонка түріндегі бағалы сыйлықтар табысталды. 

Олимпиаданы ұйымдастырушы – «El Umiti» корпоративтік қоры. Қор білім беру саласында ұлттық құндылықтарды дәріптеуге және оқушылар мен мұғалімдердің интеллектуалдық әлеуетін дамытуға ерекше көңіл бөледі. Олимпиаданың негізгі міндеті – оқушылар мен ұстаздардың сыни ойлау қабілеті мен көшбасшылық дағдыларын дамытуға ықпал ету. 

Бұл шара еліміздің білім беру жүйесін жетілдіруге және жастардың тарихи санасын нығайтуға ықпал ететін маңызды бастамалардың бірі болып табылады. Болашақта осындай жобалар еліміздің білім беру саласындағы үздік тәжірибелерді дамытуға және ұлттық сананы қалыптастыруға үлес қоса беретіні сөзсіз.